4. डिबा-किसुन हुल (निबंध)

डिबा सोरेना: जानाम दो राजनगर सुर मातकोमबेडा आतु रे 1820 ई. सेरमा रे हुय लेना। नोवा जायगा दो झारखण्ड पोनोत् रेनाक् सरायकेला तोरोप् रे मेना: आ। डिबा सोरेन आच् बाबा वाक् ञुतुम दो देवी सोरेन‌ तांहेंकाना। डिबा सोरेन रिन मितटाड. बोयहा तांहेंकाना आर उनियाक् ञुतुम दो भादव सोरेन तांहेंकाना। किसुन मुर्मू वाक् जानाम दो राजनगर सुर गुमिद आतु रे हुय लेना। उनियाक् मामो ओड़ाक् दो डिबा सोरेन तेको ओड़ाक् रे तांहेकाना। मेनखान डिबा-किसुन तिकिन दो मामो-हातोम होपोन किन तांहेंकाना। नुकिन दो मातकोमबेडा सुर रेनाक् डांडोबुरू रेगे बाड़तीकिन तांहेंकान तांहेत्। ओंडे गे तिरियो – बानाम एमानको किन बाजाव बाड़ाय तांहेन। उनिकिन‌ रिन गुरु वाक् ञुतुम दो रघुनाथ भुंइया तांहेंकाना।

उन जोखोच् पोड़ाहाट तोरोप् रिन राजा दो अभिराम सिंह ए तांहेंकाना। पोड़ाहाट तोरोप् दो आंगरेजा: गोबोल रे चालावेन खान होड़-होपोन चेतान रे आंगरेज कोवाक् नाहाचार आर कोचलोन हों बाड़ती इदियेना। होड ठेन खोन आंगरेज दो जोबोरते आकोवाक् मोने कुसी खाजना को हातावेत् ताहेंना। नोवाको विरोद रेगे डिबा-किसुन तिकिन दो डांडो आतु रे होड़को जारवा किन एहोप् केत् आ। आडी गान होड़को जुमिद् एनखान गे आंगरेजा: सासोन मुचात् लागित् 1847 ई. सेरमा रे हुल किन एहोप् केत् आ, जांहा दो डिबा-किसुन हुल मेनते बोन बाडाया।

नोवा लाड़हाय दो आडी सेरमा धाबिच् हुय लेना। नोवा हुल दाबाव लागित् आंगरज दो डिबा-किसुन तिकिन साप् रेनाक् गोटा केत् आ को। ओनाते आकिनाक् तायोम आंगरेज आर राजा रिन फाद को लागाव केत् कोवा। उनकिन दो डांडोबुरु रे तांहे काते गे लाड़हाय काना किन तांहेन। आंगरेज दो साप् गे बाड.को दाड़ेया: किना। एन खोन आंगरेज दो होड़को उनकिनाक् उकु जायगा लाय लागित् टाका-पुयसा रेनाक् लालोच् को एमा: कोवा। ओना खातिर 1853 ई. सेरमा रे उनकिन दो आंगरेज ठेन किन साप् होचो एना। डिबा-किसुन तिकिन दो सरायकेला जिहोल रेको दोहो लेत् किना आर ओंडे गे को फासी गोच् केत् किना।