2.बिरसा आंदोलन (निबंध)

बिरसा मुंडा दो झारखण्ड रिन मित् आंदोलनकारी तांहेकाना। उनि दो आंगरेजाक् नाहाचार आर गोबोल बिरूध लाड़हाय लेनाय। ओनाते आको जात रिन होड़ दो बिरसा मुंडा के बोंगा लेका को मानोत एया आर ” बिरसा भगवान ” मेनते को बोंगा आया। उनि दो दिसोम रिन सानाम होड़को ” धारती आबा ”  मेनते होंको ञुतुमाया। आजा: बलिदान खातिर तेगे उनियाक् ञुतुम नितोक् हों आडी मानोत तेको हातावा। 

बिरसा मुंडावा: जानाम दो 15 नवंबर 1875 ई. सेरमा रे बिहार प्रदेश रेनाक् उलिहातु ञुतुमान आतु रे हुय लेना। ओना जायगा दो नितोक् झारखण्ड पोनोत् रेनाक् खूंटी जिला रे मेना: आ। आच् रिन आपाताक् (बाबा) ञुतुम दो सुगना मुंडा आर ऐंगाताक् (आयो) ञुतुम दो कदमी मुंडा तांहेकाना। आच् रिन आयो-बाबा दो उलिहातु खोन चालकंद आतु किन सेन एना। बिरसा मुंडा तेको दो सांगे बोयहा को तांहेलेना, ओनाते बिरसा मुंडा दो आजाक् मामो ओड़ाक् आयुब हातु रेगे हारा लेनाय। उनियाक् ओल-पाड़हाव दो चाईबासा रेनाक् मितटाड. मिशन इस्कूल रे हुय लेना। ओना मिशन रिन आंगरेज कोवाक् आदिवासी चेतान रे खाराप् बेभार को ञेलते आडी दु:ख ए बुझाव् केत् आ। उनकू मिशनरी दो आदिवासी को लालोच् एम काते आकोवाक ईसाई धोरोम रेको मेसायेत् कोवाको तांहेन। नोवाको ञेलते बिरसा मुंडा दो ओल-पाड़हाव को बागी काते आजा: आतु ओड़ाक् ते हेच् रूवाड़ एनाय। ओंडे गे आडी गान होड़ेको जुमिद् काते, उनकुवाक् बेस बाड़िच् ए बुझाव केत् कोवा। ओंडे गे बिरसा मुंडा दो ” धोरोम गुरु ” ञुतुम ते नामडाक एना। ओत हासा आर निजेयाक् धोरोम को बाञ्चाव लागित् ब्रिटिश सोरकार आर एसेल होड़को विरोद् रे उलगुलान (आंदोलन ) एहोप् केत् आय। ओना लागित् बिरसा मुंडा दो 1895 ई. रे आंगरेज को साप् केदेया आर बार सेरमा लागित्  हजारीबाग जिहोल रेको दोहो लेदेया।

1897 ई. रे बिरसा मुंडा जिहोल खोन ओडोक् काते आरहों होड़को आंदोलन लागित् जुमिद् केत् कोवाय। बिरसा मुंडा दो मुंडा जात रिन होड़को जुमिद् काते मिशनरी आर एसेल होड़को झारखण्ड खोन लागा एहोप् केआ। ओना लागित् बिरसा मुंडा आर आंगरेज तालारे खूंटी सुर रेनाक् डोम्बारी बुरू रे 9 जनवरी 1900 ई. हिलोक् लाड़हाय हुय एना। ओना लाड़हाय रे बिरसा मुंडा रिन आडी गान होड़ेको बाजाव एना। आडी गान होड़ दो आकोवाक् जिवी बाञ्चाव लागित् डोम्बारी बुरू रेको उकू लेना। बिरसा मुंडा दो आंगरेज खोन बाञ्चाव काते सिंहभूम रेनाक् चक्रधरपुर बिर ते ञिर चालाव एनाय आर दोहड़ा लाड़हाय लागित् होड़को जुमिद् एहोप् केत् आय। मेनखान आच् रिन गाते गे पुयसा रेनाक् लालोच खातिर आंगरेज ठेन को साप् होचो केदेया। बिरसा मुंडा दो रॉंची जिहोल रेको दोहो लेदेया। ओंडे तांहेन जोखोच् गे बिस एम काते को गोच् केदेया। 9 जून 1900 ई. सेरमा रे बिरसा मुंडा दो नोवा धुड़ी धारती खोन चालाव सांगिञ एनाय।